दर्जेदार साहित्याने परिपूर्ण असलेला हेमांगी दिवाळी अंक आता ऑनलाइन झाला आहे. येत्या वर्षापासून या दर्जेदार साहित्याचा आस्वाद ऑनलाइन घेता येणार आहे. हे साहित्य तुम्हाला युनिकोडमध्ये तसेच पीडीएफ फॉर्मेटमध्ये वाचायला मिळणार आहे. तत्पूर्वी २००९मध्ये प्रसिद्ध झालेल्या हेमांगी दिवाळी अंकाची ही झलक वाचकांसाठी दिली आहे. 
दुर्गाकमळा! दुर्गाबाई भागवत आणि कमलाबाई सोहोनी. दोघी सख्या बहिणी. मोठया दुर्गाबाईने साहित्यविश्व व्यापले तर धाकटया कमळाबाईने अवघे विज्ञानविश्व आपलेसे केले. दुर्गाकमळा हा शब्द हेतुत: योजला आहे. या दोघी बहिणी अहमदनगरला आत्या सीताबाई भागवत यांच्याबरोबर राहून शिकत असताना, पंचक्रोशीतल्या मुली खेळायला त्यांना हाक मारीत ती 'दुर्गाकमळा' या जोडनावाने. मग त्यांतील एखादीला जरी बोलवायचे झाले तरीही 'दुर्गाकमळा' अशी दुपेडी हाकच येई. त्यांचा उल्लेखही 'दुर्गाकमळा' असाच केला जाई. बहिणींचे हे अद्वैत अखेरपर्यंत टिकले.
बा.भ. बोरकर (जन्म 1910- मृत्यू-1984) यांचे हे जन्मशताब्दी वर्ष. मराठीतील एक विलक्षण समृध्द व विविध पैलू असलेलं व्यक्तिमत्त्व. बारा मराठी कवितासंग्रह, तीन कोकणी कवितासंग्रह, तीन स्वतंत्र मराठी कादंबऱ्या, काही अनुवादित कादंबऱ्या, दोन कथासंग्रह, तीन ललितलेख संग्रह, मेघदूत, रघुवंश या दोन संस्कृत काव्यांचे अनुवाद, काही स्वतंत्र संपादने, 'महात्मायन'चा अपूर्ण पण अपूर्व संकल्प. 
पु. शि. रेगे यांच्या जन्मशताब्दीच्या निमित्ताने 'रेगेय साहित्या'चा पुनश्च विचार होईल, तर कदाचित मराठी साहित्याच्या दालनाला नव्यानं झळाळी येण्याची शक्यता वाटते. ही शक्यता जोखण्यासाठीच तर श्रेष्ठ साहित्यिंकांची जन्मशताब्दी साजरी करायची असते.